De Roskam op Twitter    De Roskam op Facebook   
  • Home

Doot oew woark

Viej hebt oons beste doan um alle leu moondig te maken. Alleman hef ne meaning. Alleman hef ook een kanaal um de meaning oet te dreagen. Alleman kan metdoon an de verkiezingen met ne eagne polletieke partieje. En doar he-w nieje partiejn van as PVV, FvD, PvdD, BBB en NSC. Ook stemt de leu völle makkelijker as vroger op partiejen woer ze de eagen meaning better in wierkent. Opkomsten biej verkiezingen zeent hoge. En wat doo-w? Zeikstraaln dat oonze samenleaving tot op het bot verdeeld is. Mear dat koomp juust umda-w allemoal oonze eagne meaning hebt. En alleman geliekschakeln dut miej deanken an nen helen verkeerden tied.

Loa-w ’s gewoon zeggen woer ’t op steet. In ’n Haag maakt de grote ego’s der nen proemenpot van. Viej zeent de leste tied verestig lenger demissionair dan at ‘r regeerd wordt. Papn, nathooldn en meest nog meender. Mear dee vallende kammenetn komt echt nit duur dee zogenaamde tot-op-het-bot verdeelde samenleaving. Vroeger heetten dat gewoon diversiteit en warre viej doar zelfs bliej met. Dat dit in Nederlaand allemoal kón; wát ’n gelukke. Mer viej hebt de zaken in ’n Haag gewoon slecht eregeld. Terwiel de stemmers elke keer eur plich doot, geve viej toch de stemmers oaweral de schoold van. Dus doo-w naffeln oawer regio-kandidaten of heugere  kiesdreampels. Mear det zeent gewoon morfinetabletten teegn de zearte, de echte oorzaakn bliewnt boetn skot. Lege kiesdreampels heurt juust biej de kleanschaligheaid van Nederlaand. Groot vuurdeel is da-j altied dreks zeet woer de leu met gangs zeent.

Nooit goan knoojn an de goo oonderkaante, mear boaven-an! Ne coalitie is ne luxe. Mear um te regeern he-j de meeste tied ginne coalitie neudig. Viej sprekt ook of de-w 4 volle joarn oons woark doot. Wil iej dat met ne coalitie? Goat oew gaank. Mear vaalt zon kammenet,  dan nooit automatisch ook nieje verkiezingen. De opdracht blif um der met mekoar oet te kommen bínnen dee 4 joar. An ’t eande van dee 4 joar doo-w wier stemmen, want dan geve viej as kiezers oonze meaning en zee-w precies hoe de samenleaving der oaver dech. Fealijk net zo as biej een gemeenteroad en Provinciale Stoaten.  

Ik wor echt kotsmisselijk van dat geknooi in ’n Haag. Elke keer dat gedreig met ne crisis um oewn zin te kriegn. Het zal nit mear helpen. En nooit mear weardige ministers noa een half joar al op non-actief zetten. Dee möage munn zich nuttig maakn. Ze doot gewoon eur woark woer viej ze vuur betaalt. Gewoon dát. Mear hoof nit.

TEKST: GEERRIT DANNENBERG

 

Deel dit nieuws!