Stofzugers
Der was ooit nen tied van echte stofzugers. Dee hetn zo umdet ze ook stof zeugen. Doar gongen reaizigers met langs de duren. Dee maakn nen ofsproak vuur ’s oawends. Dan warren de kearls en de vrouwleu in ’t hoes. Dee begunnen met ne komme koffie, gewoon mét cafeïne, want doar har toen gin meanske last van.
Noa de koffie zatten ze een plestiekn multomapje op de toafel en dan verteelden ze oawer een oetveender van een stofzuger en geschiedenis van het apparaat. En natuurlijk leup dee hele ontwikkeling oet op ne oerdegelijke mesiene woer iej wat an hébt in de hoesheuldige. Gin fantasie-mesienen van standwoarkers op de moarkt: stofzugers woe’j roeten met köant lappen of siensappeln skellen. Nee, ‘n robuust stukke gereedskop um oew hoes stofvriej te kriegen.
En dán pas gaf den vertegenwoordiger nen demonstratie. Eerst dee-r-e gewoon de vloere of de vloerbedekking. Zo kloar as een kleuntje. En dan köm het heugtepeunt. Want de slange en de hulpstukke ko’j ook nen halven slag dreejn en wes het stof op hoge kasten an de buurte. Den verkoper biej oons zea: “Al wa’k boawen op dee kaste tegenkomme, stoa’k neet vuur in. Mear viej brengt oe neet op de stroate.” Toen’e biej oons oawer bookenkaste dee, kleunk der nen klap en der vleug wat met geweeld duur de slange noar binnen hen. Allemoal kieken in een stofzugerzak: gelukkig, het wes nen reem van het fototoestel.
Stofzugers dee ’t echt stof zeugen. Mear de Europese Gemeenschap maakt ook regels vuur stofzugers. Van Brussel munn de gewone hoes-stofzugers duurzaam wean. Ze mangt nit mear zo hard zoegen, want det kost te völle stroom. Doarumme dreejt tegenwoordige alle nieje stofzugers op halve krach. Ook de zoegkracht is de helfte meender. In de adverteanties wordt ‘r een mooi verhaal van emaakt um det verlees oet te leggen. Iej least zwamverhalen over meender zoegkracht en méár lochtstroom. Wat ’n onzin.
De stofzugers van tegenswoordig kö’j allene nog in ne light-oetvoering kriegen. A’j nen oalden stofzuger hebt en iej zeent an nen niejn too; goat astenbleef noar de repairshop en loat ne maken. Weant ‘r zeunig op. Der was ooit nen tied van echte stofzugers: a’j doar met gangs gongen, vleug van alns noar binnen hen: gordienen, spiekers, schroewen, kanaries en hamsters. Mear det is lange eleedn.