Contextrijk leren
Wat dinge zeent tiedloos, zo as oonderwies en een vak learen. Dat doo’j met nen leraar en nen vakman m/v. Goat zitten, stille wean en good lustern, doar kö’j van learen. Loop iej vaste? Eerst zelf proberen um der oet te kommen. Wil dat neet, dan help ik oe. Een oonderwieskundig adviesbureau schrif doar zo een book oawer vol, mear het seempele groondprincipe is al doezenden joaren oold.
Iej zollen deanken dat de oonderwieswearelnd het groondprincipe alverdan better löt floreern duur een biotoop vruchtboarder te maakn. Mear de ofgelopen joaren is een biotoop zódöanig verniejd dat zelfs het oonderwiesgroondprincipe in dee niejmoodse umgeving neet mear welig wast. Wiej maakt de klassen grötter, wiej haalt de möage oet de leslokaaln, wiej ruilt de “lusterlessen” in vuur doo-zelf-sessies en wiej haalt van boeten neet-deskundige en bevuuroordeelde hulpkrachen oet het thoesfroont van de studeanten. Oolders-verzorgers hebt aaltied het beste vuur met de eagne wichter. Mear dat is echt heel wat aanders as jonge leu opleaiden tot zelfstaandigheaid.
In de oonderwiesumgeving hadden oolders-verzorgers van oolds twee keer in ’t schooljoar een kort gesprek met de learkrachten. Mear toen köm het oonderwiesvolgsysteem Magister. Alns van oew wich kö’j in ’t hoes hele dage volgen: alle ciefers, alle beoordelingn en elke keer at’e neet zin fatsoen heul. Het hele zelfstaandige schoolleaven oaverdag was in enen klap vot. ’t Kreeg ook ne hele aandere dynamiek. Leraren mutten elken misstap in Magister zetten. Dan kan een teamleaider op schole én de va en moo in ’t hoes dat ook leazen. Mear as de hele context doar nit biej is, dan krie’j een volstrekt verkeerd beeld. Wat vuurof-gung en wat der umhen gebuurden is der neet.
En nog völle akeliger: een leerling/studeant zit ‘r tusken-in. In ’t hoes kuijert ze met oaver de lessen in de schole oaverdag. Oet de schole komt adviezen vuur in ‘t hoes. Het beste learen is aaltied nog “contextrijk leren” ewes. Mear met Magister hale viej een context heelmoals vot. Een leerling gedreg zich oaverdag heel aanders, want at fout geet, dan regelt de oolders het noa schooltied wal met een leraar en de schole.
Oonze oalden en grootoalden deden van: “Goat ‘r mear noar den leraar hen. A’j oaverdag groot genog zeent um probleemn te maken, dan maak iej dat zelf ook mear wier trechte.” Leg oet woer ’t duur ekömmen is. Vroagnt wat ‘r ech gebuurd is. Beedt oew excuus a’j een bek te groot hebt ehad. En dat maakt den leerling allemoal zélf wier in order, zoonder de va en moo. Net as later, at’e groot is en zich ook allene mut redden.
In de NRC steun ofgelopen wekke een groot verhaal um Magister of te schaffen. Zol heel good wean. Dan doot alle möage wier an “contextrijk leren”.
GERRIT DANNENBERG